গোকুলানন্দ গীতিস্বামী (Gokulanada Gitiswami) গিরক এগরে বিষ্ণুপ্রিয়া মণিপুরী জাতর জনকগো বুলিয়া মাততারা। গোকুলানন্দ গীতিস্বামী গিরক এগই বিষ্ণুপ্রিয়া মণিপুরী সমাজেত্ত নিরক্ষরতা,অন্ধবিশ্বাস,কু-সংস্কার, ভ্রষ্টাচার, অনাচার বারো অরাজকতা কিতা কিতি সেচানিরকা মহতী সমাজ সংস্কারর লালফাম অকরেসিল। এতাবাদে গিরক এগই বিষ্ণুপ্রিয়া মণিপুরী সমাজ নিয়া নিয়ামপারা সমাজ-সংস্কারমুলক এলা, কবিতা, নাটক বারো আরতাউ নানান রচনা ইকরিয়া বিষ্ণুপ্রিয়া মণিপুরী জাত, সংস্কৃতি বারো ঠাররহানরে গজে কাকরিয়া গেসেগা। সমাজ-সংস্কার বারো জাগরনে নিয়াম ভুমিকা থনায় গিরক এগ গীতিস্বামী উপাধি পাসিল।

গেলগা শতকর আগর শতক লমনির পাতাপে বিজাতীয় সংস্কৃতির হৎগত বাহিয়া মিমুৎ অনার পথহাত্ত জাতহানরে রক্ষা করানিরকা গিরকএগো আবির্ভুত অসিল। গিরকর যুগে বিষ্ণুপ্রিয়া মণিপুরী জাতর মানুরাং নিজর জাতর বারে সচেতনতা বারো বাহানাহান জবরে কমসিল। আকসময়ৎ মিয়াঙে পাশ্চাত্য শিক্ষা পেয়া যেসাদে সায়েপ মালনির গৈগ অসিলা, উসাদে বিষ্ণুপ্রিয়া মণিপুরীর শিক্ষিত সমাজ মিয়াঙ মালনিরকা উন্মাদ অসিলা। পুরানা গিরিগিথানিয়ে বারো মেইতেই মালনিরকা গৈগ অসিলা। ঔ সমেইৎ অন্যান্য সভ্যজাতর মুঙে নিজর মাতৃভাষাহান টটারতে কুনো বিষ্ণুপ্রিয়া মণিপুরী আগই লাজ নাপেইতে নাদেখেসি,শিক্ষিত বারো অশিক্ষিত কুনো বিষ্ণুপ্রিয়া আগই মাতৃভাষাহানলো চিঠিআহান ইকরতে বা ইকরুয়েইতে না দেখেসি; এলা কীর্ত্তন দেনাতে দুরেই থাক। নিজর জাতর হাবি সংস্কৃতি রুহিবৃত্তি আচার নিয়ম হাবি মানুয়ে পাহুরানি অকরলা। জাত এহান এসাদে নিশ্চিণ্হ অনার পথে সালসিলা সমেয় উহাত গীতিস্বামী গিরক সক্রেটিসর সাদে নুয়া আশার, নুয়া সম্ভাবনার বাণী আমার গরে গরে প্রচার করিয়া বুললো। তা দেহাদিলো যে, এরে ঠার এরে সংষ্কৃতি এহার বিতরে ডাঙর সম্ভাবনা আহান আছে। হুদ্দা মানুর থতাৎ বুলের লেইরাপা ঠার এহানলৌ সাহিত্য অনা য়াকরের, রসসৃষ্টি অনা পারের।

গিরকর মুল্যবান ইকরা বারো অবদান ঔতা হাবি সংরক্ষন করানি সম্ভব নাসে। এলা বারো কবিতা পেয়ার উতার বপতাই মানুর থতাত্ত থতাৎ বুলে বুলে মৌখিক সাহিত্য আকারে। ডঃ কালীপ্রসাদ সিংহ বারো হরিদাস সিংহ গিরকে গীতিস্বামীর করপেখ কতহান খমকরানির হৎনা করেসি। রচনা যেহানি পেয়ার অউতাত্তই গিরক এগোর প্রতিভা বারো অবদান সম্বন্ধে হারপানি য়াকরের। গোকুলানন্দ গীতিস্বামী গিরকর অমর রচনাবলীরমা হাবিত্ত জনপ্রিয় বারো নাঙকরাহান অইলতা - "কালে কালে কালর কথা নাহুনানি নাকরের, জিগয় বনহান পুড়িয়া আনলে কাচায় মজায় নাধরের"।

গোকুলানন্দ গীতিস্বামীর জরম এবাকার বাংলাদেশর মৌলভীবাজার জিলার ভানুগাছে ১৮১৮ শকর আগন মাহাত। তারিখ এহান ইংরেজী সালর হিসাবলো লামসাম ১৮৮৬ খ্রীস্টাব্দর ২৬ নভেম্বর পড়েরগা। গিরক জরম নেসেগা গাঙউহার নাঙহান মাধবপুর যেহান হৌবাকার ভানুবিল পরগনার বিতরে পড়িসিল। গীতিস্বামীর বাপকর নাঙহান ঙৌবা সিংহ। ঙৌবা সিংহ সংস্কৃত ভাষার বিদ্বান বারো পন্ডিত আগো আসিল। মালক আমুতলা দেবী আদর্শবতী বেয়াপাগ আসিলি।

কনাকেত্ত গোকুলানন্দর বুদ্ধিলৌশিং নিয়াম চৌখাত অসিল। লেইরাপা গরর শৌগ অনায় বপকারে লেইরিক তামকরে নারেসে। কিন্তুমান লেইরিক তামকরানির কাজে গিরকর খৌরাঙ বারো হৎনার লম নেয়সিল। মাধবপুরেত্ত নিম্নবাংলা পাশ করিয়া ইংরেজী তামকরানিরকা গোকুলানন্দ ত্রিপুরার কৈলাশহর গেসিলগা বারো অপেইৎ অষ্টম মান পেয়া তামকরেসিল। ত্রিপুরার রাতাছড়া নাঙর গাঙউহৎ গিরক এগো থাইল। উতার পিসেদে সরকারি অনুদান পেয়া গোকুলানন্দ আগরতলার সংস্কৃত চতুষ্পাঠিত সংস্কৃত তামকরিয়া নানান শাস্ত্রত বিধিগত জ্ঞান অর্জন করেসিল। এতার হেরেদে ১৯২৫ সালে ত্রিপুরার রাতাছড়া গাঙে ব্যক্তিগত উদ্যোগে প্রাইমারী স্কুল আগ প্রতিষ্টা করিয়া বারো উগৎ নিজে লেরিক বাগাদিয়া শৌশুমারা মানু হংকরানিৎ মেইখ্যু অসিল।

শিশির সিংহর ইকা গোকুলানন্দ গীতিস্বামীর প্রতিকৃতির ড্রয়িং আগো বিষ্ণুপ্রিয়া মণিপুরী ঠারর সাহিত্যত আদি আধুনিক যুগর (গেলগা শতাব্দির তৃতীয় দশকে) চারিগো প্রধান সাহিত্যিকরমা গোকুলানন্দ গীতিস্বামী নাঙহান অগ্রগন্য। সাধারনভাবে মাতিকবুল্লে ঔ সমেইত সাহিত্য ভাষা বারো রচনাভংগির কুনো নির্দিষ্ট রূপ আহান লেপ নাসিল। উহানে রচনা ঔতা সমালোচনার সুক্ষদৃষ্টিলো মিল্লেঙ দেনা থকনেই। তবে গীতিস্বামী গিরকরাং দেহিয়ারতা অভিনবত্ব আহান- তার ইকরাৎ সাহিত্যিক চিন্তাধারার যথার্থ প্রকাশ আহান ঘটেসে। গোকুলানন্দ গীতিস্বামী গিরকর চিন্তা চেতনা জীবন র্দশন প্রকাশ পাসে তার ইকরা, তার রচনা বারো এলার মাধ্যমে। গিরক এগোই বিষ্ণুপ্রিয়া মণিপুরী সমাজ নিয়া নিয়ামপারা সমাজ-সংস্কারমুলক এলা, কবিতা বারো নাটকর বারেউ নীতিশাস্ত্র বা চরিত্র গঠনমুলক আরতাউ নানান রচনা করিয়া গিয়াসেগা। গিরকে বেনামউ নানান এলা, নাটক, কবিতা ইকরেসে। ডঃ কালীপ্রসাদ সিংহ গিরকে ১৯৬৬ ইংরেজী সালে গীতিস্বামীর জিলক শ্রীমতি রোহিনী সিংহ গিথানকরাঙতো করপেখ খানি যোগার করেসে। এতাবাদে হরিদাস সিংহ গিরকে বিচ্ছিন্নভাবে সিতারাসে গীতিস্বামীর রচনা কতহান খমকরেসে। ডঃ সিংহ গিরকে গীতিস্বামী গিরকর রচনা উতারে তিনহান প্রধান ভাগে ভাগ করিয়া দেহুয়াসে - সমাজ সংস্কারমুলক বা সমাজ জাগরনীমুলক রচনা, পদাবলী কীর্ত্তন বারো অন্যান্য কবিতা।

গোকুলানন্দ গীতিস্বামী রচিত পদাবলী কীর্ত্তনর বিতরে উল্লেখযোগ্যতা অইলতা - বাসক, নৌকাবিলাস, মোহিনীবেশ, মান, মাথুর ইত্যাদি নানান রসকীর্ত্তনগীতি। এতা বাদে বিছ্ছিন্নভাবে লেঙকরা কতহান ধর্মীয় এলা কতহানৌ আছে।

গীতিস্বামীর কবিতারমা নৈতিকতা, চরিত্রগঠনমুলক বারো সদাচারর নিয়াম বাণী পেয়ার। বিচ্ছিন্নভাবে লেংকরা কবিতা উতাররমা উল্লেখযোগ্যতা - ইমা, বাবা, বেয়ক-বনক, নিজর গরগো, সৎসঙ্গ, হবানেই মানু, আকতা অনি, পরার কথা, কল লামানি, তাপকো লায়লায়, বিহাসি মাটিহান, লেইরিক তামকরানি, নিজর গাঙহান ইত্যাদি। নীতিজ্ঞানমুলক কবিতার বারে বিয়ান, বরিষা, আলুৱা ইত্যাদি কবিতা পেয়ার।

হাবিরে কাদুয়েয়া ১৯৬২ খ্রীষ্টাব্দর জুলাই মাহার ১০ তারিখে ত্রিপুরাৎ গীতিস্বামী গিরক দৌর খয়া পেইল। ঔদিন ত্রিপুরা সরকারর বারাদেত্ত রাজ্যহানাত সাধারন ছুটি ঘোষনা করানি অসিল।